Аляксей Якімовіч

Якімовіч, А. Белакрылая птушка : аповесці, вершы / Аляксей Якімовіч. – Мінск : Беларусь, 2021. – 197, [2] с.

У новых аповесцях вядомага беларускага пісьменніка А. М. Якімовіча расказваецца пра падлеткаў, якія трапляюць у розныя драматычныя сітуацыі і годна спраўляюцца з імі.

У кнігу ўключаны і новыя вершы аўтара.

Якімовіч, А. М. Загадкавы храм : [дэтэктыўная аповесць, вершы, прыпеўкі] / Аляксей Якімовіч. – Мінск : Беларусь, 2021. – 125, [2] с.

Дзеянне аповесці адбываецца ў невялікім раённым гарадку. Прадпрымальнік Менкін пасяляецца ў будынку, які некалі быў храмам. Менкін і яго жонка Святлана адчуваюць сябе на вяршыні шчасця. Але іх радасць азмрочваецца нечаканымі падзеямі, якія неўзабаве пачынаюць адбывацца ў храме і наганяюць жах на гаспадароў. Менкін кліча на дапамогу былога дэсантніка Андрэя. Ён спадзяецца, што Андрэй дапаможа яму ў гэтую цяжкую хвіліну. У кнігу таксама ўвайшлі вершы і прыпеўкі.

Якімовіч, А. Залатая дзіда : [аповесць]; Рыжык : [апавяданне : к зборніку ў цэлым : для сярэдняга школьнага ўзросту] / Аляксей Якімовіч. – Мінск : Беларуская Энцыклапедыя, 2013. – 125 с. – (Кніжная паліца школьніка).

Творы «Залатая дзіда» і «Рыжык» Аляксея Мікалаевіча Якімовіча рэкамендавны для пазакласнага чытання па беларускай літаратуры вучням 5 класа.

Якімовіч, А. Залатая дзіда : Аповесці. Апавяданні : Для сярэд. шк. узросту / Алесь Якімовіч. – Мн. : Юнацтва, 2001. – 266, [2] с. – (Бібліятэка прыгод і фантастыкі).

У кнігу ўвайшлі дзве аповесці – «Залатая дзіда» пра незвычайныя, фантастычныя прыгоды герояў у Лацінскай Амерыцы і «Выпрабаванне», у якой аўтар расказвае аб старажытнай Беларусі, аб тым, што давялося перажыць героям, каб выратаваць сваіх блізкіх і сустрэцца з бацькамі.

Вострасюжэтныя дэтэктыўныя апавяданні «Пажар», «Лімонка» і іншыя раскрываюць асаблівасці светапогляду сучасных падлеткаў.

Якімовіч, А. М. Каб мама ўсміхалася : апавяданні, казкі, смяшынкі : [для малодшага школьнага ўзросту] / А. М. Якімовіч. – Мінск : Народная асвета, 2012. – 119, [1] с.

Хто загляне ў кніжку і пачытае яе, навучыцца вялікай мудрасці, цеплыні і дабрыні, чуласці і смеласці, чалавечай спагадлівасці, узаемавыручцы і многаму іншаму, з чым мы сустракаемся ў жыцці і без чаго не можам абысціся.

Якімовіч, А. Калі кукавала зязюля : аповесці : [для старэйшага школьнага ўзросту] / Аляксей Якімовіч. – Мінск : Звязда, 2013. – 205, [2] с. – (Пераходны ўзрост).

У кнігу ўвайшлі дзве прыгодніцка-гістарычныя аповесці для падлеткаў і юнакоў – «Калі кукавала зязюля» і «Панскае дзіця». Выданне вучыць любіць Радзіму, шанаваць і аберагаць сваіх родных і блізкіх.

Якімовіч, А. Карп у футры : [апавяданні, вершы, прыпеўкі] / Аляксей Якімовіч. – Мінск : Беларусь, 2021. – 166, [1] с.

Кнігу беларускага пісьменніка і навукоўца Аляксея Якімовіча адкрываюць апавяданні, у абсалютнай большасці дэтэктыўныя. Экстрэмальныя сітуацыі, захапляльныя прыгоды і неардынарныя сюжэты – так можна ахарактарызаваць гэтыя творы, дзе галоўнымі героямі выступаюць сучасныя падлеткі і дарослыя.Таксама ў кнігу ўвайшлі лірыка і «антывірусныя» прыпеўкі.

Якімовіч, А. Матэматычныя казкі-падказкі : [для дзяцей малодшага школьнага ўзросту] / А. Якімовіч. – Мінск : Народная асвета, 2018. – 30 с. : іл. – (Бібліятэка Асветыка).

У кнізе, як у вучэбным дапаможніку, раскрываецца чараўніцтва матэматыкі. Разам з героямі казак вучні малодшых класаў змогуць складаць, множыць, аднімаць, вырашаць жыццёвыя задачы.

Якімовіч, А. Металічны чалавек : аповесці-казкі / А. М. Якімовіч. – Мінск : Пачатковая школа, 2016. – 112 с. : іл.

Аповесці-казкі Аляксея Якімовіча распявадаюць пра неверагодныя прыгоды Робата з добрым сэрцам, які шукаў сабе сяброў. Неспадзяваныя, часам небяспечныя сустрэчы са зласлівым панам Спіцай і яго памагатымі вучаць галоўнага героя знаходзіць выйсце з любых абставінаў. Выпрабаванні не толькі раскрываюць характар Робата, але і дапамагаюць яму сустрэць сапраўдных, верных сяброў.

Якімовіч, А. Мой сябар Дон Кіхот : аповесці : [для сярэдняга школьнага ўзросту] / Аляксей Якімовіч. – Мінск : Мастацкая літаратура, 2018. – 331, [2] с. – (Бібліятэка прыгод і фантастыкі).

З чым мы сустракаемся ў жыцці і без чаго не можам абысціся? Без сяброўства, дабрыні, смеласці, узаемавыручкі.  Аповесць «Мой сябар Дон Кіхот» вучыць падлеткаў гэтым важным чалавечым якасцям.

Трагічныя падзеі сямнаццатага стагоддзя, калі рушылася беларуская дзяржаўнасць, паказаны ў аповесці «Здраднік» на перакладе варагуючых сем’яў Станішэўскіх і Краўцоў.

У прыгодніцка-фантастычнай аповесці «Эльдарада просіць дапамогі» шасцікласнікі даведваюцца, што каля іх вёскі з’явіліся дзіўныя прыхадні, якія просяць дапамог… Ці маглі дзеці застацца безуважнымі да чужой бяды?

Якімовіч, А. М. Нязваныя госці : прыгодніцка-гістарычная аповесць, мастацкія гіпотэзы, вершы, прыпеўкі для настрою / Аляксей Якімовіч. – Мінск : Беларусь, 2022. – 197, [2] с.

1461 год… На Беларусь рабілі набегі атрады крымскіх татараў. На старонках аповесці чытачы змогуць пазнаёміцца з хлапчукамі Базылём і Раманам, дзяўчынкай Марысяй, якія трапілі ў палон да татараў. Каб абараніць дзяцей, падняліся ўсе дарослыя мужчыны з навакольных вёсак.

Частку зборніка складаюць мастацкія гіпотэзы «Як узніклі фразеалагізмы». Гэта новы жанр літаратуры, які не толькі пазнаёміць чытачоў з цікавымі фразеалагізмамі, але і дазволіць ім зазірнуць у мінулае. У кнігу ўключаны самабытныя вершы пра каханне і для роздуму, вершаваная скорагаворка на ўсе літары беларускага алфавіта.

Якімовіч, А. М. Пан : аповесць і апавяданні / Аляксей Якімовіч. – Мінск : Беларусь, 2021. – 133, [2] с.

Героі аповесці, якія прыехалі адпачываць у санаторый сустракаюцца ў лесе з Панам — міфічным гаспадаром лясоў, палёў і статкаў з казлінымі нагамі, рагамі і барадой. Гэты твор аб каханні, вернасці і здрадзе.

Дэтэктыўныя апавяданні, змешчаныя ў зборніку, вострасюжэтныя, напісаныя на маральна-этычныя тэмы, якія хвалююць грамадства. Для шырокага кола чытачоў.

Якімовіч, А. Пастка для пярэваратня : Аповесці : Для сярэд. шк. ўзросту / Аляксей Якімовіч. – Мн. : Юнацтва, 1997. – 300 с. – (Бібліятэка прыгод і фантастыкі).

У аповесці, якая дала назву кнізе, аўтар уваскрашае падзеі сярэдзіны XIV стагоддзя на Панямонні. У аснове апавядання – напад атрада крыжакоў на вёску Парэчча, пасля чаго ў ваколіцах паселішча з’яўляецца таямнічая жанчына… з барадой.

Не менш драматычная сітуацыя складваецца і для герояў аповесці-казкі «Гуслі на дзікай грушы».

Якімовіч, А. Прыгоды Белай Мышкі : аповесці-казкі / Аляксей Якімовіч. – Мінск : Звязда, 2018. – 126, [1] с.

У кнігу ўвайшлі дзве аповесці-казкі: «Зачараваныя Ружы і Белая Мышка» і «Зачараваны Матылёк і Белая Мышка». Іх галоўныя героі – Белая Мышка і нядобры міфічны хлопчык Чапялейка, якія ўвасабляюць сабою вечнае супрацьстаянне дабра і зла.

Аўтар робіць акцэнт на дыялогі дзеючых асоб, таму можна рэкамендаваць дадзеныя казкі для пастаноўкі на тэатральнай сцэне.

Якімовіч, А. Русалка : фантастычна-містычныя апавяданні / Аляксей Якімовіч. – Мінск : Беларусь, 2020. – 133, [2] с.

Творы Аляксея Якімовіча з першай старонкі захапляюць чытача. Той, хто цікавіцца рэальным і фантастычным, знойдзе ў гэтай кнізе і цікавыя гісторыі, і незвычайных герояў. Для гэтых вострасюжэтных фантастычна-містычных апавяданняў характэрны яркія вобразы, прадуманая кампазіцыя, нечаканыя павароты падзей. Многія канфлікты нагадваюць сённяшняе жыццё.

Якімовіч, А. М. Сакрэт Тунгускага метэарыта; Прыгоды шасцікласніка Максіма : аповесці / Алексей Якімовіч; [маст. А. А. Арынушкін]. – Мінск : Юнацтва, 1993. – 253, [2] с. – (Бібліятэка прыгод і фантастыкі).

Назва «Сакрэт Тунгускага метэарыта» гаворыць сама за сябе. Але каб наблізіцца да разгадкі гэтай «таямніцы веку», сябрукам Антону і Васілю давялося злётаць ажно… на планету Сіз. Героі другой аповесці знаходзяць сабе прыгоды дома і ў школе, на роднай зямлі.

Якімовіч, А. Сем гісторый пра Воўка і Вожыка : апавяданні і казкі / А. Якімовіч; мастак В. Архіпенка. – Мінск : Пачатковая школа, 2016. – 57 с. : іл.

Казкі займаюць асаблівае месца ў жыцці дзіцяці. Праз іх ён пазнае асноўныя маральныя каштоўнасці, спасцігае розніцу паміж дабром і злом, праўдай і хлуснёй. Займальныя, павучальныя казкі Аляксея Якімовіча з дынамічным сюжэтам, вясёлымі персанажамі, сярод якіх і адмоўныя героі выклікаюць сімпатыю, зацікавяць нават самага няўрымслівага малыша. Невялікія апавяданні распавядаюць пра розныя выпадкі з жыцця звычайных дзяцей, вучаць дабрыні, спагадлівасці і павагі да старэйшых.

Якімовіч, А. М. Слёзкі Сонца : апавяданні, казкі, смяшынкі / Аляксей Якімовіч; [мастак Л. У. Пашчасцева]. – Мінск : Народная асвета, 2014. – 93, [1] с.

Апавяданні, казкі (сярод іх ёсць і прытчы), смяшынкі, п’ескі, як старэйшыя сябры, раскажуць вясёлыя, пазнавальныя гісторыі пра людзей і казачных жывёл, пра значэнні слоў і матэматычныя знакі, навучаць мудрасці, дабрыні, спагадлівасці і ўзаемавыручцы – таму, без чаго ў жыцці нельга абысціся.

Якімовіч, А. М. Я, Сямён і барабашка : аповесць-казка : [для сярэдняга школьнага ўзросту] / А. М. Якімовіч. – Мінск : Народная асвета, 2011. – 126 с. : іл.

Вучні шостага класа Язэп і Сямён заўважаюць, што ў Язэпавай хаце пасяліўся таемны барабашка. Потым разам з ім яны трапляюць у незвычайную краіну. У гэтай краіне побач з людзьмі жывуць даўнія язычніцкія багі. Пачынаюцца фантастычныя прыгоды, якія становяцца сапраўдным выпрабаваннем для хлопчыкаў і іхняй сяброўкі Пярвушкі.

Якімовіч, А. М. Хітрая ліса : апавяданні, казкі / А. М. Якімовіч; мастак У. С. Пашчасцеў. – Мінск : Народная асвета, 2011. – 96 с.

Апавяданні і казкі, як старэйшыя сябры, раскажуць вяселыя, пазнавальныя гісторыі пра людзей і казачных жывел, пра знакі прыпынку. Навучаць мудрасці, дабрыні, спагадлівасці і ўзаемавыручцы – таму, без чаго ў жыцці нельга абысціся.

Якімовіч, А. Эльдарада просіць дапамогі : прыгодніцка-фантастычная аповесць, аповесці-казкі, вершы: [для малодшага і сярэдняга школьнага ўзросту] / Аляксей Якімовіч. – Мінск : Беларусь, 2023. – 485, [2] с.

У аповесці «Эльдарада просіць дапамогі» расказваецца пра сяброў-шасцікласнікаў, якія даведваюцца пра тое, што каля іх вёскі з’явіліся незвычайныя прышэльцы. Сябры знаходзяць у рэчцы прыбітую да берага бутэльку з запіскай: «Людзі, дапамажыце нам! Вас просяць жыхары Эльдарада…» Ці маглі дзеці застацца безуважнымі да чужой бяды? У кнізе таксама змешчаны аповесці-казкі і вершы.

Якімовіч, А. Эльдарада просіць дапамогі : аповесці : [для сярэдняга школьнага ўзросту] / Аляксей Якімовіч. – Мінск : Юнацтва, 1989. – 234, [2] с. – (Бібліятэка прыгод і фантастыкі).

Сябры-шасцікласнікі даведваюцца пра тое, што каля іх вёскі з’явіліся дзіўныя прышэльцы, знаходзяць на рэчцы прыбітую да берага запіску ў бутэльцы – крык аб дапамозе: «Людзі, дапамажыце нам! Вас просяць жыхары Эльдарада…» Ці маглі дзеці застацца безуважнымі да чужой бяды?

 У другой аповесці, якая ўвайшла ў кнігу, героі твора ўступаюць ва ўзаемадзеянне з ажыўшымі персанажамі народных казак.

Якімовіч, А. М. Як дзядуля ў прыметы верыў : аповесць пра школьныя гады / А. М. Якімовіч; [мастак У. С. Пашчасцеў]. – Мінск : Народная асвета, 2012. – 79 с.

Аповесць сучаснага беларускага пісьменніка са Слоніма Аляксея Якімовіча расказвае пра ўзаемаадносіны паміж двума галоўнымі героямі – дзядулем і ўнукам. Аўтар  паказвае, як нараджаюцца любоў і ўзаемапавага паміж блізкімі людзьмі. Дзядуля заахвочвае ўнука да чытання, бо ў кнігах схаваны ўсе таямніцы свету. Ідэя твора – паказаць, як з любові пачынаецца сапраўдная сям’я, дзе не толькі дзядуля дапамагае ўнуку, але і ўнук клапоціцца пра свайго дзеда.

Якімовіч, А. М. Як Заяц і Воўк сябравалі ды навукі вывучалі : казкі / Аляксей Якімовіч. – Мінск : Народная асвета, 2017. – 46 с. – (Бібліятэка Асветыка).

Гэта кніга адначасова і зборнік казак, і падручнік. Яна распавядае пра незвычайнае жыццё Зайца і Воўка, якія не толькі сябруюць, але і ходзяць у лясную школу, дзе вывучаюць тыя ж навукі, што і сапраўдныя школьнікі.